Miercoles de Cenisa, Umpisa ng Panahon ng Kuwaresma

Ang panahon ng Kuwaresma ay nag-uumpisa sa araw ng Mierkoles de Cenisa (Ash Wednesday). Nilalagyan ng ating mga pari o mga ministro ang ating mga noo ng kurus mula sa abo at pinapaalalahanan tayong lahat na "TAYO'Y ALABOK AT SA ALABOK TAYO'Y BABALIK". At kung minsan sinasabi ng pari o ministro ang "TALIKDAN NA ANG KASALANAN AT SUMUNOD SA EBANGHELYO."

Ang Pangkalahatang Iglesia ni Cristo ang siyang nagtatakda ng Araw ng Kuwaresma ayon sa Liturhiya ng Simbahan. Maliban sa Santa Iglesia Katolika, ang iba pang mga iglesia Protestante ay nakikiisa sa paggunita nitong mga Mahal na Araw.

Halina't tayo'y magtika, mag-ayuno at gumawa ng mabuti hindi lang sa panahon ng Kuwaresma ngunit sa lahat ng panahong tayo'y nabubuhay. Magpasalamat tayo at tayo'y hinirang na maging kabahagi ng Katawan ni Cristo- ang Santa Iglesia Katolika na siyang tunay na Iglesiang kay Cristo Hesus.

Maligayang pagdiriwang ng Kuwaresma!

Sabi ni Papa Benito XVI: Dapat matakot sa kasalanan kaysa sa pag-uusig

Si Papa Benito XVI sa paggunita ng kapistahan ng Immaculada Concepcion (Larawan mula sa Italian Tribune)

Dapat ang Iglesia ay matakot sa kasalanang ginagawa ng kanyang mga kaanib higit pa sa takot ng pang-uusig.

Ito ang mga binitiwang mga salita ng Santo Papa kahapon sa paggunita sa kapistahan ng Imaculada Concepcion.

Ayon sa Santo Papa ang pag-uusig sa Iglesia ni Cristo mula pa noong Unang Siglo hanggang sa kasalukuyan ay pinagtagumpayan na ng Santa Iglesia sa mahigit 2,000 taon na ang nakalilipas. Ang pagtatagumpay na ito ay isang pagtatagumpay ng Dios.

Sa kabila ng panawagan ng ilang mga Obispo ng Iglesia ni Cristo na dapat nang dalhin sa international forum ang usapin tungkol sa pag-uusig sa mga Kristiano, mariing sinabi ni Papa Benito XVI na mas nakakasira sa Iglesia ni Cristo ang mga kasalanang ginagawa ng mga kaanib nito.

"The only danger the church can and should fear is the sin of her members," ani Santo Papa Benito XVI.

Ipagpatuloy ang pagbabasa rito...

Mabuhay si Cristo Hari ng Iglesia!

Ngayong araw ng Linggo ipinagdiriwang ng Banal na Iglesia ni Cristo ang Kapistahan ng Kristong Hari. Ang kapistahang ito ang hudyat ng huling linggo ng buong taon ng Liturhiya ng Santa Iglesia.

Bagamat ipinagdiriwang din ito ng mga Protestante, ito ay ginawang institusyon ng lingkod ng Dios na si Papa Pius XI noong taong 1925 A.D. sa kaniyang encyclical na pinamagatang Quas Primas.

Kung sa pangkaraniwang Kalendaryo, ito ang huling linggot ng taon at sa susunod ng Linggo ay Unang Linggo ng Adbiento-- ang Adbiento ay Apat na Linggong paghahanda bago ang dakilang araw ng Pasko ng Pagsilang niHesus.

Ano ang iminumungkahi ng Araw ng Kapistahan ng Kristong Hari?

Ayon sa Liturgical Calendar ng Iglesia ni Cristo, ang lahat ng pagdiriwang at kapistahang ating ginanap sa buong isang taon ay si Cristo Hesus lamang ang tugatog at rurok nito. Si Cristo ang tanging dahilan ng ating mga pagdiriwang sapagkat siya lamang ang pinagmumulan ng kabanalan ng mga santo at santa ng Iglesia. Nais lamang ipagbunyi ng Santa Iglesia na sa pamamagitan ng pagdiriwang na ito, tayo'y nagpapasakop sa paghahari ng Dios na si Cristo. Tayo ay nagpapasakop sa kanyang kabanalan at kabutihan. Tayo'y nagpapasakop sa kanyang kabunyian.

Lingid sa kaalaman ng mga hindi sumasampalataya sa mga paniniwala ng Iglesia ni Cristo, ang mga pagdiriwang ng mga kaanib nito sa mga kapistahan ng kanilang mga Patron ay si Cristo pa rin ang tanging dahilan. Ang mga banal at santo ng Iglesia ay nagbuwis ng buhay hindi para sa kanilang sariling kapakanan kundi si Cristo Hesus ang dahilan na totoong Dios at Tao ang Iglesia, at ng kaniyang nag-iisa, banal, pangkalahatan at apostolikang Iglesia.

Narito ang ating mga Pagbasa sa Banal na Biblia:

Unang Pagbasa: Ez 34:11-12, 15-17

Salmo: Ps 23:1-2, 2-3, 5-6

Pangalawang Pagbasa: 1 Cor 15:20-26, 28

Ebanghelyo: Mt 25:31-46

Ito rin ang mga pagbasa sa lahat ng mga Iglesia ni Cristo sa buong mundo ano man ang wika at tradisyong kanilang kinaaaniban.

Mabuhay si Cristo Hesus, hari ng Iglesia ni Cristo!